raat be-ḳhvabiyon ka safar tere bin
din hai bechainiyon ka nagar tere bin
qurbaten faslon men badalti rahin
bad-gumani har ik moḌ par tere bin
chandni men sahar, husn, ThanDak na nuur
aib tha us ka har ik hunar tere bin
ḳhvab ḳhana-ba-doshon se phirte rahe
niind bhi ho ga.i dar-ba-dar tere bin
mere balon men chandi pirote rahe
tez-raftar sham-o-sahar tere bin
phir tire lauTne ki ḳhabar aa.i thi
ham nahin the kabhi be-ḳhabar tere bin
ankhen jalti hain meri diyon ki jagah
shaam se ghar ki dahliz par tere bin
ab na savan, na jhule, na sakhiyan, na giit
jaise ḳhamosh saara nagar tere bin
chandni DhunDhti thi tire naqsh-e-pa
raat, taron ki dahliz par tere bin
Leave a Reply