Pandit Daya Shankar Naseem Lakhnavi
qurs-e-ḳhur ko dekh kar taskin rakh ai mehman-e-sub.h
ta-dahan-e-sham pahunchata hai raziq nan-e-sub.h
ma.ani-e-raushan jo hon to sau se behtar ek sher
matl.a-e-ḳhurshid kaafi hai pa.e-divan-e-sub.h
sair-chashmi diid ke bhukon ki dekho kahti hai
mah panir-e-sham hai ḳhurshid-e-taban nan-e-sub.h
sadqe us parvardigar-e-pak ke jis ne kiya
bahr-e-tifl-e-ghuncha paida shir-e-be-pistan-e-sub.h
sub.h-dam gha.eb hue ‘anjum’ to sabit ho gaya
ḳhanda-e-behuda par toḌe ga.e dandan-e-sub.h
vasl ki shab aankh dikhla kar ye anjum kahte hain
lo qayamat aa.i mashriq se uTha tufan-e-sub.h
dekhe vo gulshan jo din-do-din rahe yaan misl-e-gul
ham to shabnam-san ‘nasim’ ek dam ke hain mehman-e-sub.h
Leave a Reply