Zehra Nigaah
qurbaton se kab talak apne ko bahlaenge ham
doriyan mazbut hongi chhutte jaenge ham
tera rukh saae ki janib meri ankhen su-e-mahr
dekhna hai kis jagah kis vaqt mil paenge ham
ghar ke saare phuul hangamon ki raunaq ho gae
khali gul-danon se baten karke so jaenge ham
adh-khuli takiye pe hogi ilm-o-hikmat ki kitab
vasvason vahmon ke tufanon men ghar jaenge ham
us ne ahista se ‘zahra’ kah diya dil khil utha
aaj se is naam ki khushbu men bas jaenge ham
Leave a Reply