Qatil

suna hai tum ne apne aḳhiri lamhon men samjha tha

ki tum meri hifazat men ho mere bazuon men ho

suna hai bujhte bujhte bhi tumhare sard o murda lab se

ek shoala shola-e-yaqut-fam o rang o ummid-e-farogh-e-zindagi-ahang lapka tha

hamen ḳhud men chhupa liije

ye mera vo azab-e-jan hai jo mujh ko

mire apne ḳhud apne hi jahannam men jalata hai

tumhara sina-e-simin

tumhare bazuvan-e-mar-marin

mere liye

mujh ik havasnak-e-faromaya ki ḳhatir

saaz o saman-e-nashat o nashsha-e-ishrat-fuzuni the

mire ayyash lamhon ki fusun-gar pur-jununi ke liye

sad-lazzat agin sad-karishma pur-zaboni the

tumhen meri havas-pesha

miri saffak qatil bevafai ka guman tak

is guman ka ek vahm-e-ḳhud gurezan tak nahin tha

kyuun nahin tha kyuun nahin tha kyuun

koi hota koi to hota

jo mujh se miri saffak qatil bevafai ki saza men

ḳhuun thukvata

mujhe har lamhe ki suuli pe latkata

magar fariyad koi bhi nahin koi

daregh uftad koi bhi

mujhe mafrur hona chahiye tha

aur main saffak-qatil bevafa ḳhun-rez-tar main

shahr men ḳhud-vardati

shahr men ḳhud-mast azadana phirta huun

nigar-e-ḳhak-asuda

bahar-e-ḳhak-asuda

Leave a Comment