Qaid Mein Raqs

sab ke liye na-pasandida udti makkhi

kitni azadi se mere munh aur mere hathon par baithti hai

aur is roz-marra se azad hai jis men main qaid huun

main to subh ko ghar bhar ki khaak sametti jaati huun

aur mera chehra khaak pahanta jaata hai

dopahar ko dhuup aur chulhe ki aag

ye donon mil kar vaar karti hain

gardan pe chhuri aur angara ankhen

ye mera shaam ka roz-marra hai

raat bhar shauhar ki khvahish ki mashaqqat

meri niind hai

mera andar tumhara zahr

har tiin mahine baad nikal phenkta hai

tum baap nahin ban sake

mera bhi ji nahin karta ki tum mere bachche ke baap bano

mira badan meri khvahish ka ehtiram karta hai

main apne niilo niil badan se pyaar karti huun

magar mujhe makkhi jitni azadi bhi tum kahan de sakoge

tum ne aurat ko makkhi bana kar botal men band karna sikha hai

Leave a Comment