qaid men bhi hai junun dast-o-gareban ham se
aa ke ḳhalvat men bhi milta hai bayaban ham se
qais sauda-e-gham-e-gesu-e-laila ke liye
le gaya chand ḳhayalat-e-pareshan ham se
ishq men itna zamana hamen guzra hai ki log
puchhte aate hain is dard ka darman ham se
koi naqus-o-jaras ki nahin karta fariyad
ham jo nalan hain to har shaḳhs hai nalan ham se
haal ka apne hamen ilm nahin un ko hai
raaz rakhte hain hamara bhi vo pinhan ham se
qaid-e-gham se hai riha.i bahut asan ‘natiq’
sharm is ki hai ki vabasta hai zindan ham se
Leave a Reply