Qaid-E-Imkan Se Tamanna Thi Gamin chhuT Gai

Shahab Jafri

qaid-e-imkan se tamanna thi gamin chhuT ga.i

paanv ham ne jab uThaya to zamin chhuT ga.i

liye jaata hai ḳhalaon men jamal-e-shab-o-roz

din kahin chhuT gaya raat kahin chhuT ga.i

zindagi kya thi main ik mauj ke pichhe tha ravan

aur vo mauj ki sahil ke qarin chhuT ga.i

bud-o-bash apni na puchho ki isi shahr men ham

zindagi laa.e the ghar se so yahin chhuT ga.i

dil se duniya tak ik aisa hi safar tha jis men

kahin dil aur kahin duniya-e-hasin chhuT ga.i

sub.h-dam dil ke makan se sabhi rishte TuuTe

dar-o-divar se fariyad-e-makin chhuT ga.i

kya gharib-ul-vatani si hai gharib-ul-vatani

asman saath chala ghar ki zamin chhuT ga.i