Qaid Aap Apne Hi Mein Raha Hun Ghalat Nahin

qaid aap apne hī meñ rahā huuñ ġhalat nahīñ

maiñ sūrat-e-ḳhayāl jiyā huuñ ġhalat nahīñ

paanī kā bulbula hai haqīqat meñ zindagī

phir bhī maiñ vāhimoñ meñ paḌā huuñ ġhalat nahīñ

ā.īna dekhtā hai mujhe ā.īne ko maiñ

yuuñ aks aks TuuT gayā huuñ ġhalat nahīñ

saa.e ko mere dekh ke ye maan leñge aap

maiñ aap apne qad se baḌā huuñ ġhalat nahīñ

‘premī’ agar kahūñ ki kisī ke baġhair maiñ

ḳhud se bhī ajnabī hī rahā huuñ ġhalat nahīñ

Leave a Comment