qaid aap apne hi men raha huun ghalat nahin
main surat-e-ḳhayal jiya huun ghalat nahin
paani ka bulbula hai haqiqat men zindagi
phir bhi main vahimon men paḌa huun ghalat nahin
a.ina dekhta hai mujhe a.ine ko main
yuun aks aks TuuT gaya huun ghalat nahin
saa.e ko mere dekh ke ye maan lenge aap
main aap apne qad se baḌa huun ghalat nahin
‘premi’ agar kahun ki kisi ke baghair main
ḳhud se bhi ajnabi hi raha huun ghalat nahin
Leave a Reply