Poet
pur-nur jis ke husn se madfan tha kaun tha
chehra ye kis shahid ka raushan tha kaun tha
thahra gaya hai la ke jo manzil men ishq ki
kya jaane rahnuma tha ki rahzan tha kaun tha
toda tha kis ke dil ko khilaune ki tarah se
ashiq tumhara jab ki ladakpan tha kaun tha
kis dil se hai khudai men ijad dard-e-ishq
roz-e-azal jo mujid-e-shevan tha kaun tha
hu ka maqam tha mujhe roti thi be-kasi
koi na tha jahan mira madfan tha kaun tha
jhuk jhuk ke dekhta tha vo kis ki jigar ka ghaav
tar jis ke khuun men yaar ka daman tha kaun tha
ham muskurate the vo dikhata tha sair-e-bagh
dam kis pe shefta dam-e-murdan tha kaun tha
insan tha ki koi pari-zad tha ‘sharaf’
dil mera jis ke nuur se raushan tha kaun tha
Leave a Reply