Puchho Agar to Karte Hain Inkar Sab Ke Sab

pūchho agar to karte haiñ inkār sab ke sab

sach ye ki haiñ hayāt se bezār sab ke sab

apnī ḳhabar kisī ko nahīñ phir bhī jaane kyuuñ

paḌhte haiñ roz shahr meñ aḳhbār sab ke sab

thā ek maiñ jo shart-e-vafā toḌtā rahā

hālāñki bā-vafā the mire yaar sab ke sab

socho to nafratoñ kā zaḳhīra hai ek dil

karte haiñ yuuñ to pyaar kā iz.hār sab ke sab

zindāñ koī qarīb nahīñ aur na raqs-gāh

sunte haiñ ik ajiib sī jhankār sab ke sab

maidān-e-jañg aane se pahle palaT ga.e

nikle the le ke haath meñ talvār sab ke sab

zehnoñ meñ khaultā thā jo laavā vo jam gayā

maflūj ho ke rah ga.e fankār sab ke sab

Leave a Comment