Asad Badayuni
puchho agar to karte hain inkar sab ke sab
sach ye ki hain hayat se bezar sab ke sab
apni ḳhabar kisi ko nahin phir bhi jaane kyuun
paḌhte hain roz shahr men aḳhbar sab ke sab
tha ek main jo shart-e-vafa toḌta raha
halanki ba-vafa the mire yaar sab ke sab
socho to nafraton ka zaḳhira hai ek dil
karte hain yuun to pyaar ka iz.har sab ke sab
zindan koi qarib nahin aur na raqs-gah
sunte hain ik ajiib si jhankar sab ke sab
maidan-e-jang aane se pahle palaT ga.e
nikle the le ke haath men talvar sab ke sab
zehnon men khaulta tha jo laava vo jam gaya
mafluj ho ke rah ga.e fankar sab ke sab
Leave a Reply