Farasat Rizwi
puchhe jo nishan koi anjan nikalte hain
ham rah-guzaron se be-dhyan nikalte hain
dil taaza marasim ke aghaz se Darta hai
milne se bichhaḌne ke imkan nikalte hain
kis samt ko jaate hain ai rah-e-chaman aḳhir
lashkar gul-o-nik.hat ke har aan nikalte hain
ghar rahiye ki bahar hai ik raqs balaon ka
is mausam-e-vahshat men nadan nikalte hain
tum ishq ke kuche men jaan nazr to kar dekho
marne se bhi jiine ke unvan nikalte hain
is saya-e-mizhgan men kuchh vaqt guzara hai
ham par bhi un ankhon ke ehsan nikalte hain
hasti ki ye zanjiren ye jism ki divaren
ham saath liye apna zindan nikalte hain
ham dekhte rahte hain is pyaas ke sahra se
kya qafila-e-abr-o-baran nikalte hain
gul shaḳhon pe aate hain kis alam-e-afsun se
kisi ghaib ki vaadi se insan nikalte hain
ye alam-e-hasti hai ya ḳhvab ki basti hai
jis samt chale jaa.en hairan nikalte hain
buniyad-e-ta.alluq hai ik vahm-e-shanasa.i
socho to sabhi chehre anjan nikalte hain
kis vaqt nahin rahti ankhon men vo mauj-e-ḳhun
kab dil se tire gham ke paikan nikalte hain
jis harf ke likhne men ho dil ka lahu shamil
us harf se farda ke ruj.han nikalte hain
hai harf-e-suḳhan apna bas apni hi ḳhalvat men
bazar men yaron ke divan nikalte hain
duniya ki mohabbat ka sauda na kabhi karna
is saude ke aḳhir men nuqsan nikalte hain
lo sub.h-e-adam aa.i ab hijr ki saa.at hai
shab-bhar ki sara.e se mehman nikalte hain
Leave a Reply