Anand Narayan Mulla
mohabbat se bhi kar-e-zindagi asan nahin hota
bahal jaata hai dil gham ka magar darman nahin hota
kali dil ki khile afsos ye saman nahin hota
ghaTa.en ghir ke aati hain magar baran nahin hota
mohabbat ke evaz men o mohabbat DhunDne vaale
ye duniya hai yahan aisa are nadan nahin hota
dil-e-nakam ik tu hi nahin hai sirf mushkil men
use inkar karna bhi to kuchh asan nahin hota
hansi men gham chhupa lena ye sab kahne ki baten hain
jo gham dar-asl gham hota hai vo pinhan nahin hota
zamane ne ye taḳhti kisht-e-arman par laga di hai
gul is kyari men aata hai magar ḳhandan nahin hota
kahin kya tum se ham apne dil-e-majbur ka aalam
samajh men vaj.h-e-gham aati hai aur darman nahin hota
ma.al-e-iḳhtilaf-e-bahami afsos kya kahiye
har ik qatre men shorish hai magar tufan nahin hota
dayar-e-ishq hai ye zarf-e-dil ki janch hoti hai
yahan poshak se andaza-e-insan nahin hota
ghurur-e-husn teri be-niyazi shan-e-istighna
jabhi tak hai ki jab tak ishq be-payan nahin hota
sada-e-bazgasht aati hai ayyam-e-guzishta ki
ye dil viran ho jaane pe bhi viran nahin hota
mohabbat to baja-e-ḳhud ik iman hai are ‘mulla’
mohabbat karne vaale ka koi iman nahin hota
Leave a Reply