Farah Rizwi
phir se darpesh safar ka qissa
ek TuuTe hue ghar ka qissa
ham ne ta.aviz ki surat bandha
dil se nikle hue Dar ka qissa
gosha-e-chashm ka jalte rahna
ḳhushk hote hue tar ka qissa
ḳhair ne banjh zaminon pe likha
lahlahate hue shar ka qissa
phailte phailte kaisa phaila
be-ghari teri ḳhabar ka qissa
biij ko ḳhak-e-numu tu baḳhshe
khilta ja.ega shajar ka qissa
Leave a Reply