Hasan Rizvi
phir na.e ḳhvab bunen phir na.i rangat chahen
zinda rahne ke liye phir koi surat chahen
na.e mausam men karen phir se koi ahd-e-vafa
ishq karne ke liye aur bhi shiddat chahen
ek vo hain ki nazar bhar ke na dekhen ham ko
ek ham hain ki faqat un ki hi surat chahen
baat sunne ke liye hausla dil men rakkhen
baat kahne ke liye harf-e-sadaqat chahen
un ko paane ke liye tesha-e-farhad banen
qais banne ke liye qais si vahshat chahen
saans qurban karen des pe ik din ham bhi
aisi taqdir mile aisi sa.adat chahen
ham milen aise ki jon rang mile paani men
un ki qurbat men ‘hasan’ aisi rifaqat chahen
Leave a Reply