Azad Husain Azad
paanv dekhegi na taḳhir ka dukh samjhegi
kaise manzil kisi rah-gir ka dukh samjhegi
kab sama.at pe koi harf-e-sada utrega
kab vo dastak miri zanjir ka dukh samjhegi
aks kar dunga main divar par apna chehra
aur duniya ise tasvir ka dukh samjhegi
hanste hanste hi sunegi vo miri ghazlon ko
phir mire dard ko bhi miir ka dukh samjhegi
kaise auraq bata.enge kahani meri
diary kyuun miri tahrir ka dukh samjhegi
main virasat men mila taj-mahal huun us ko
mujh ko haregi to tasḳhir ka dukh samjhegi
mujh ko bhuli hai jo shohrat ko asasa jaane
ḳhud se bichhḌegi to tash.hir ka dukh samjhegi
Leave a Reply