paani ki tarah ret ke siine men utar ja
ya phir se dhuan ban ke ḳhalaon men bikhar ja
lahra kisi chhitnar pe o miit hava ke
sukhe hue patton se dabe paanv guzar ja
chaḌhti hui is dhuup men saaya to Dhalega
ehsan koi ret ki divar pe dhar ja
bujhti hui ik shab ka tamasha.i huun main bhi
ai sub.h ke taare miri palkon pe Thahar ja
lahra.ega akash pe sadiyon tira paikar
ik baar miri ruuh ke sanche men utar ja
is ban men raha karti hai parchha.in sada ki
ai raat ke raahi tu zara tez guzar ja
us paar chala hai to ‘rashid’ apna asasa
behtar hai kisi aankh ki dahliz pe dhar ja
Leave a Reply