palak se aa lage ka.i jugnu jagmagate hue
kisi ne dekha hamen aise muskurate hue
main chahta huun ki vo bhi ḳhushi men shamil ho
so rone lagta huun aksar ḳhushi manate hue
ajiib ḳhauf andhere ka mujh ko tha us raat
pasine aa ga.e mujh ko diya bujhate hue
hamen bhi jaise achanak hi ghar ki yaad aa.i
parinde shaam ko jab guzre chahchahate hue
vo ek rut ka musafir tha rokte bhi kya
ham us ko dekh hi sakte the duur jaate hue
nigah-e-lams se ab us ko dekhna tha hamen
so aankh muund li us ke qarib jaate hue
phir ungliyon se miri risne lag gaya paani
safed kaghazon par machhliyan banate hue
Leave a Reply