pala huun nafrat ki andhiyon men magar mohabbat se munh na moḌun
hamesha baazu kushada rakhkhun kabhi muravvat se munh na moḌun
zamane bhar ki tamam talḳhi ho chahe mere lahu men shamil
purani nakamiyon se Dar ke na.i shararat se munh na moḌun
jabin pe nagah paḌne vaali shikan agar mustaqil hui hai
to zer-e-lab muskurate rahne ki achchhi aadat se munh na moḌun
bura bhala vasta bahar-taur us se kuchh der to raha hai
kahin sar-e-rah samna ho to itni shiddat se munh na moḌun
jo dar pe aa hi ga.i hai ‘yasir’ to mujh pe lazim hai ḳhair-maqdam
hazar be-dil sahi par is khurduri haqiqat se munh na moḌun
Leave a Reply