Rafiq Raaz
paida kiya hai uḌti hui ḳhaak se mujhe
nisbat yahi hai sarsar-e-saffak se mujhe
ab to asir-e-gardish-e-lail-o-nahar huun
muddat hui hai utre hue chaak se mujhe
aa.ega koi kholega band-e-qaba-e-harf
dega najat kaghzi poshak se mujhe
duniya hai ishva-saz to main huun makin-e-zat
ḳhatra nahin hai is zan-e-bebak se mujhe
par phaḌphaḌa raha huun basirat ke daam men
koi chhuḌa.e qabza-e-idrak se mujhe
rah ja.egi lakir lahu ki zamin par
le ja.iye na bandh ke fitrak se mujhe
mujh se zamin ḳhauf-zada hai ‘rafiq-raz’
ye janti hai rabt hai aflak se mujhe
Leave a Reply