abul-hasanat-haqqi

Paida Hua Ye Habab Kaisa

paida hua ye habab kaisa

dariya men hai pech-o-tab kaisa

ab fasl-e-junun kahan hai baaqi

phir dekh raha huun khvab kaisa

tha dast-e-hunar men mom sa jo

pathra gaya vo shabab kaisa

sim-sim ki sada pe khul raha tha

tha halqa-e-dar-e-sarab kaisa

ek ek varaq padha hua sa

hai nuskha-e-intikhab kaisa

partav se tire vajud mera

aghosh men le hijab kaisa

kya jaane hamari talkh-kami

hai zaiqa-e-sharab kaisa

khushbuen tavaf kar rahi thiin

tha pichhle pahar khitab kaisa

qatra qatra chamak raha hai

raushan hua zer-e-ab kaisa

main apne khilaf ho gaya huun

nazil hua ye azaab kaisa

muddat se hai band qufl-e-abjad

ai muhtasibo hisab kaisa

sab mauj-e-hava men rang us ke

ai momino ijtinab kaisa

divar ka bojh baam par hai

ye ghar bhi hua kharab kaisa

More Poems

Leave a Comment