pahuncha hai aaj qais ka yaan silsila mujhe
jangal ki raas kyuun na ho ab-o-hava mujhe
aana agar tira nahin hota hai mere ghar
daulat-sara men apne hi ik din bula mujhe
vo hove aur main huun aur ik kunj-e-afiyat
is se ziyada chahiye phir aur kya mujhe
paida kiya hai jab se ki main rabt-e-ishq se
begana janta hai har ek ashna mujhe
kafir buton ki raah na ja aa khuda ko maan
pir-e-khird ne garche kaha bar-ha mujhe
par kya karun ki dil hi nahin ikhtiyar men
us khanuma-kharab ne aajiz kiya mujhe
pahle hi apne dil ko na dena tha us ke haath
‘iman’ ab to koi padi hai vafa mujhe
Leave a Reply