Zafar Iqbal
paa.e hue is vaqt ko khona hi bahut hai
niind aa.e to is haal men sona hi bahut hai
itni bhi faraghat hai yahan kis ko mayassar
ye ek taraf baiTh ke rona hi bahut hai
tujh se koi filhal talab hai na tamanna
is shahr men jaise tira hona hi bahut hai
ham oḌh bhi lete hain ise vaqt-e-zarurat
ham ko ye mohabbat ka bichhauna hi bahut hai
ugta hai ki miTTi hi men ho jaata hai miTi
is biij ka is ḳhaak men bona hi bahut hai
ḳhush-hal bhi ho sakta huun main chashm-e-zadan men
mere liye us jism ka sona hi bahut hai
apne liye in chand sitaron ko sar-e-sham
is shaḳh-e-tamasha men pirona hi bahut hai
pahle hi bahut ḳhaak uḌaa.i hai yahan par
mere liye is dasht ka kona hi bahut hai
dariya ki ravani ko ‘zafar’ chhoḌiye filhal
thoḌa sa ye honTon ko bhigona hi bahut hai
Leave a Reply