Pae Hue Is Waqt Ko Khona Hi Bahut Hai

paa.e hue is vaqt ko khonā hī bahut hai

niiñd aa.e to is haal meñ sonā hī bahut hai

itnī bhī farāġhat hai yahāñ kis ko mayassar

ye ek taraf baiTh ke ronā hī bahut hai

tujh se koī filhāl talab hai na tamannā

is shahr meñ jaise tirā honā hī bahut hai

ham oḌh bhī lete haiñ ise vaqt-e-zarūrat

ham ko ye mohabbat kā bichhaunā hī bahut hai

ugtā hai ki miTTī hī meñ ho jaatā hai miTī

is biij kā is ḳhaak meñ bonā hī bahut hai

ḳhush-hāl bhī ho saktā huuñ maiñ chashm-e-zadan meñ

mere liye us jism kā sonā hī bahut hai

apne liye in chāñd sitāroñ ko sar-e-shām

is shāḳh-e-tamāshā meñ pironā hī bahut hai

pahle hī bahut ḳhaak uḌaa.ī hai yahāñ par

mere liye is dasht kā konā hī bahut hai

dariyā kī ravānī ko ‘zafar’ chhoḌiye filhāl

thoḌā sā ye hoñToñ ko bhigonā hī bahut hai

Leave a Comment