paḌa hua main kisi aa.ine ke ghar men huun
ye tera shahr hai ya ḳhvab ke nagar men huun
uḌaa.e phirti hai an-dekhe sahilon ki hava
main ek umr se ik be-karan safar men huun
tujhe ye vahm ki main tujh se be-ta.alluq huun
mujhe ye dukh ki tire halqa-e-asar men huun
miri talash men gardan hain tiir kirnon ke
chhupa hua main ḳhunuk saya-e-shajar men huun
main teri samt bhi a.unga ma.arifat ko tiri
abhi to apne hi irfan ki rahguzar men huun
tiri uḌaan men shamil hai tarbiyat meri
mujhe na bhuul ki main tere bal-o-par men huun
bula raha hai udhar mujh ko mera mustaqbil
ghira hua main idhar haal ke bhanvar men huun
rakhegi tujh ko mo.attar sada mahak meri
racha hua main tire ghar ke bam-o-dar men huun
miri parakh ko bhi a.enge jauhari ‘betab’
huun la.al-e-nab magar shahr-e-kam-nazar men huun
Leave a Reply