Alam Khursheed
koi bhi shai kahan nayab hai hamare liye
khula hua to dar-e-ḳhvab hai hamare liye
hamen hi raushni us ki nazar nahin aati
charagh to pas-e-mehrab hai hamare liye
palak jhapakte hi sab kuchh naya sa lagta hai
ye zindagi bhi koi ḳhvab hai hamare liye
utarte jaate hain pahna.iyon men dariya ki
ki jalti sham.a tah-e-ab hai hamare liye
hamin ne band kiye hain tamam darvaze
ye shahr aaj bhi betab hai hamare liye
bas ek mauj ne ye haal kar diya apna
har ek mauj hi girdab hai hamare liye
har ek shaḳhs ke da.ave alag alag ‘alam’
agarche baam pe mahtab hai hamare liye
Leave a Reply