nuqush-e-umr-e-guzishta sameT laate hain
ye rang rang ke badal kahan se aate hain
kabhi kabhi safar-e-zindagi se ruuTh ke ham
tire ḳhayal ke saa.e men baiTh jaate hain
tasavvurat ke hasrat-kade men kaun aaya
charagh ta-had-e-ehsas jalte jaate hain
hamen hai Dar koi tar-e-umid TuuT na jaa.e
sambhal sambhal ke unhen hal-e-dil sunate hain
bana ga.e hain vo yuun saz-e-arzu ghar ko
ki aaj tak dar-o-divar gungunate hain
unhin se hai mire ashkon ki aabru ‘kausar’
jo ab-o-rang-e-ghazal ko ghazal banate hain
Leave a Reply