Nizam-E-Gulshan-E-Hasti Badal Ke Dam Lenge

nizām-e-gulshan-e-hastī badal ke dam leñge

hudūd-e-rañj-o-alam se nikal ke dam leñge

shu.ūr hāsil-e-maqsad jise samajhtā hai

ye azm hai usī manzil pe chal ke dam leñge

matā-e-amn luTā.eñge ham zamāne meñ

nizām-e-jabr-o-tashaddud kuchal ke dam leñge

nadīm bahr-e-musībat meñ sūrat-e-tūfāñ

machal machal ke uTheñge sambhal ke dam leñge

nahīñ pasand rivāj-e-kohan hameñ ‘qaisar’

na.e nizām ke sāñche meñ Dhal ke dam leñge

Leave a Comment