niyaz-e-ishq hai naz-e-butan hai
mohabbat ka.enat-e-do-jahan hai
hijabat-e-ta.ayyun uTh rahe hain
nigah-e-shauq tera imtihan hai
masarrat bhi baḌi ne.amat hai lekin
tire gham se mujhe fursat kahan hai
na rahbar hai na jaada hai na manzil
nigahon men ghubar-e-karvan hai
tire naqsh-e-qadam par chal raha huun
ḳhuda jaane miri manzil kahan hai
mira zauq-e-siyah-kari na puchho
tumhare hi karam ka imtihan hai
yahi shayad hai takmil-e-tasavvur
mujhe ḳhud par bhi ab un ka guman hai
tum apne gham ki azmat mujh se puchho
tumhara gham hayat-e-javidan hai
ye duniya hai ‘ra.is’-e-soḳhta-jan
yahan har gaam par ik imtihan hai
Leave a Reply