niind raton ki mire yaar uḌati hai ghazal
sub.h tak ek ghazal-go ko jagati hai ghazal
log kahte hain ghazal kahna koi kaam nahin
kya ḳhabar un ko ki kis kaam men aati hai ghazal
raat jab paas mire koi nahin hota hai
mujh ko siine se laga kar ke sulati hai ghazal
ek misra ki koi sher ata kar ke mujhe
apne chakkar men ka.i roz ghumati hai ghazal
Thiik se gar ye likhi jaa.e paḌhi jaa.e yahan
ek insan ko insan banati hai ghazal
Leave a Reply