niind aa ga.i thi manzil-e-irfan se guzar ke
chaunke hain ham ab sarhad-e-isyan se guzar ke
ankhon men liye jalva-e-nairang-e-tamasha
aa.i hai ḳhizan jashn-e-baharan se guzar ke
yadon ke javan qafile aate hi rahenge
sarma ke isi barg-e-pur-afshan se guzar ke
kanTon ko bhi ab bad-e-saba chheḌ rahi hai
phulon ke hasin chaak gareban se guzar ke
vahshat ki na.i rahguzar DhunDh rahe hain
ham ahl-e-junun dasht o bayaban se guzar ke
ban ja.ega taara kisi mayus ḳhala men
ye ashk-e-sahar gosha-e-daman se guzar ke
avargi-e-fikr kidhar le ke chali hai
sar-manzil-e-azadi-e-insan se guzar ke
paa.i hai nigahon ne tiri bazm-e-tamanna
raton ko chinaron ke charaghan se guzar ke
ik gardish-e-chashm-e-karam ik mauj-e-nazara
kal shab ko mili gardish-e-dauran se guzar ke
milne ko to mil jaa.e magar lega bhala kaun
sahil ka sukun shorish-e-tufan se guzar ke
ik nishtar-e-gham aur sahi ai gham-e-manzil
aa dekh to ik roz rag-e-jan se guzar ke
ab dard men vo kaifiyat-e-dard nahin hai
aaya huun jo us bazm-e-gul-afshan se guzar ke
Leave a Reply