nigahon se nigahen samne hote hi jab laḌiyan
yakayak khul ga.iin donon taraf se dil ki kuljhaḌiyan
ye ab ki shab-barat ai yaar tujh bin ham pe yuun guzri
hava.i to hamari aah thi aur ashk phul-jhaḌiyan
hamari aah jaise laḳht-e-dil se guth ke nikle hai
kahin dekhi hain tiin is lutf se phulon ki bhi chhaḌiyan
mua majnun to ik muddat hui par ab tak is gham men
karen hain naala mil kar ham-digar zanjir ki kaḌiyan
zamin se ye lago nahin gul bhala kis tarah nikle hain
jo lakhon suraten dilkash nahin is ḳhaak men gaḌiyan
kabhu TuuTa na mizhgan se miri aansu ka zanjira
na jaane ashk ke qatre the ya moti ki ye laḌiyan
bhare aate hain ‘qa.em’ pai-ba-pai is tarah aansu se
kahe tu chashm ko meri ki hain ye rahT ki ghaḌiyan
Leave a Reply