nigah o dil men vahi karbala ka manzar tha
main tishna-lab thi mire samne samundar tha
bahut ghurur tha biphre hue samundar ko
magar jo dekha mire ansuon se kam-tar tha
hamare hisse men aai hai ret sahil ki
kisi ne chhin li vo siip jis men gauhar tha
bahut sukun tha thahre hue samundar ko
ki us men jo bhi tha tufan mere andar tha
vo shakhs aaya tha ai ‘shama’ le ke mausam-e-gul
use khabar hi na thi dard mera zevar tha
Leave a Reply