uTha KHema Yahan Se Kuch Kar Aahista Aahista

Poet

uTha ḳhema yahan se kuuch kar ahista ahista

abhi to ḳhair mumkin hai safar ahista ahista

darichon ki abhi to raushni galiyon men baaqi hai

magar jab band ho ja.enge dar ahista ahista

bayabanon se nikle aur samundar tak chale aa.e

ki ab karna hai paani ka safar ahista ahista

idhar se qais hi kya ek puuri qaum guzri hai

ye baiThega ghubar-e-rah-guzar ahista ahista

yahan ik dusre ki jaan ke dushman na ho jaa.en

ye ham donon nikal aa.e kidhar ahista ahista

abhi kuchh bastiyan abad hain kuchh shahr baaqi hain

abhi kuchh aur niklenge khanDar ahista ahista

dar-o-divar ke us paar ham-sayon ko niind aa.i

shab-e-tanha.i mujh se baat kar ahista ahista

abhi be-tegh bhi zinda huun lekin mere hathon se

‘sana’ ab chhuT ja.egi sipar ahista ahista