nazzara-e-jamal ne sone nahin diya
shab bhar tire khayal ne sone nahin diya
pahle naved-e-vasl miri niind le udi
phir nashsha-e-visal ne sone nahin diya
jis roz us ke jhuut ki sachchaiyan khulin
suqrat ki misal ne sone nahin diya
kis khub-surati se juda kar diya hamen
dushman ke is kamal ne sone nahin diya
jo bhiik mangte hue bachche ke paas tha
us kasa-e-saval ne sone nahin diya
shab bhar main jagti rahi jis ranj ke sabab
din ko bhi us malal ne sone nahin diya
kitni thakan safar ki thi par vapsi ki shaam
is shauq-e-arz-e-hal ne sone nahin diya
‘ruhi’ main khvab-e-ishq se jaagi to us ke baad
kitne hi mah-o-sal ne sone nahin diya
Leave a Reply