Ummeed Fazli
nazar na aa.e to kya vo mire qayas men hai
vo ek jhuuT jo sachcha.i ke libas men hai
amal se mere ḳhayalon ka munh chiḌhata hai
vo ek shaḳhs ki pinhan mire libas men hai
abhi jarahat-e-sar hi ilaaj Thahra hai
ki nabz-e-sang kisi dast-e-be-qayas men hai
shajar se saaya juda hai to dhuup suraj se
safar hayat ka kis dasht-e-be-qayas men hai
zara jo talḳh ho lahja to koi baat bane
gharib-e-shahr magar qaid-e-iltimas men hai
tujhe ḳhabar bhi hai ḳhud teri kam-nigahi ka
ik e’tiraf tire harf-e-na-sipas men hai
Leave a Reply