Nazar KHamosh Hui Arz-E-Na-Tamam Ke Baad

nazar ḳhamosh huī arz-e-nā-tamām ke ba.ad

kuchh aur kah na sake ashk-e-be-kalām ke ba.ad

ye muġhbache tire saaqī abhī haiñ ḳhīra bahut

har ek jām-e-tahī aur salā-e-ām ke ba.ad

bas itnī baat ke kyā kyā haiñ bazm meñ charche

vo muskurā se diye the mire salām ke ba.ad

namāz-e-jām paḌhī shaiḳh ne nahīñ lekin

ajab sā nuur hai ruḳh par tulū-e-shām ke ba.ad

har ik nazā.a kā hal intiqām hī hai abhī

magar savāl to ye hai ki intiqām ke ba.ad

ye lag rahā hai ki jaise bichhaḌ rahī hai hayāt

palaT palaT ke nigāheñ haiñ gaam gaam ke ba.ad

kisī mahal kisī vaadī kisī chaman meñ nahīñ

vo gul jo dil meñ mahaktā hai nek kaam ke ba.ad

ġhurūr-e-tishna-sāqī bhī hai koī shai saaqī

taqāzā ham nahīñ karne ke jaam jaam ke ba.ad

ye sach nahīñ ki mire dil meñ aur naam nahīñ

magar ye sach hai ki ye sab haiñ tere naam ke ba.ad

hai ziist ziist usī kī ki jis ke baazū ko

urūh-e-sub.h bhī DhūñDe nigār-e-shām ke ba.ad

badaltī qadroñ meñ kuchh huuñ ki kuchh nahīñ ‘mullā’

savāliya sā nishāñ huuñ ḳhud apne naam ke ba.ad

Leave a Comment