Anand Narayan Mulla
nazar ḳhamosh hui arz-e-na-tamam ke ba.ad
kuchh aur kah na sake ashk-e-be-kalam ke ba.ad
ye mughbache tire saaqi abhi hain ḳhira bahut
har ek jam-e-tahi aur sala-e-am ke ba.ad
bas itni baat ke kya kya hain bazm men charche
vo muskura se diye the mire salam ke ba.ad
namaz-e-jam paḌhi shaiḳh ne nahin lekin
ajab sa nuur hai ruḳh par tulu-e-sham ke ba.ad
har ik naza.a ka hal intiqam hi hai abhi
magar saval to ye hai ki intiqam ke ba.ad
ye lag raha hai ki jaise bichhaḌ rahi hai hayat
palaT palaT ke nigahen hain gaam gaam ke ba.ad
kisi mahal kisi vaadi kisi chaman men nahin
vo gul jo dil men mahakta hai nek kaam ke ba.ad
ghurur-e-tishna-saqi bhi hai koi shai saaqi
taqaza ham nahin karne ke jaam jaam ke ba.ad
ye sach nahin ki mire dil men aur naam nahin
magar ye sach hai ki ye sab hain tere naam ke ba.ad
hai ziist ziist usi ki ki jis ke baazu ko
uruh-e-sub.h bhi DhunDe nigar-e-sham ke ba.ad
badalti qadron men kuchh huun ki kuchh nahin ‘mulla’
savaliya sa nishan huun ḳhud apne naam ke ba.ad
Leave a Reply