narm shagufta chandni hansta hua kanval kahun
aisa koi sanam kahan jis ke liye ghazal kahun
chand ko chehra-e-alam zaḳhm ko ik kanval kahun
dil mira chahta hai aaj aisi koi ghazal kahun
taj-mahal ko marmarin jism ki ik ghazal kahun
apni ghazal ko nuur ka uḌta hua mahal kahun
jugnu ho ya sitara ho ashk hai meri aankh ka
mah-jabin ghazal ko apni koi ghazal kahun
aap ki baat chhoḌiye aap to be-misal hain
husn-e-jafa-shi.ar ko kyuun na main be-badal kahun
din hai farishta maut ka tegh-e-qaza liye hue
gham ki siyah raat ko sar pe khaḌi ajal kahun
rah-e-hayat pur-ḳhatar naqd-e-hayat muḳhtasar
ishq ko be-asar kahun ilm ko be-amal kahun
tul-e-shab-e-firaq se kam the ḳhushi ke mah-o-sal
vasl ki ek umr ko hijr ka ek pal kahun
sach hai agar ki aadmi chand pe paanv rakh chuka
taare bhi toḌ sakta hai us ko bhi muhtamal kahun
fikr ki ye nazakaten sher ki ye latafaten
husn ka ik asar kahun ishq ka ik amal kahun
sard ana ki kashmakash sham-e-firaq ban ga.i
vo hai agar ba-zid to kya ‘raz’ ko bhi aTal kahun
Leave a Reply