Nam Hui Chashm-E-Wafa Raaz-E-Mohabbat Khul Gaya

Poet

nam hui chashm-e-vafa raz-e-mohabbat khul gaya

aḳhirash band-e-qaba-e-zabt-e-ulfat khul gaya

jab dil-e-vahshi nigah-e-naz ka markaz bana

haal duniya par tira ai jazb-e-vahshat khul gaya

shah-rah-e-arzu par do qadam chalne ke ba.ad

husn-e-qismat se dar-e-zindan-e-ulfat khul gaya

jhuk gaya fart-e-nadamat se gunahgaron ka sar

ho ga.i chashm-e-inayat bab-e-rahmat khul gaya

dastan-dar-dastan thi zindagi insan ki

dekhte hi dekhte rang-e-haqiqat khul gaya

ek jadui-nazar ke ho ga.e lakhon shikar

dil ki girhen kya khulin ramz-e-shahadat khul gaya

jab faraz-e-arsh par uudi ghaTa chha.i ‘saba’

bab-e-mai-ḳhana ba-e.ajaz-e-mashiyyat khul gaya