Nala Shab-E-Firaq Jo Koi Nikal Gaya

naala shab-e-firaq jo koi nikal gaya

josh-e-junun se chiir ke cahrkh-o-zuhal gaya

puchha mizaj is ka jo rashk-e-masih ne

le kar mariz-e-ishq sambhala sambhal gaya

nikli zaban-e-shama se kya baat raat ko

sunte hi jis ko bazm men parvana jal gaya

ahd-e-shabab chashm-e-zadan men hua tamam

jhonka tha ik nasim ka aa kar nikal gaya

dar-e-fana men kaun hai jis ko qayam hai

koi yahan se aaj gaya koi kal gaya

kaisa hi koi kyuun na ho koi chalak shahsavar

guzra jo rah-e-ishq men vo sar ke bal gaya

ab aai raat dekhen guzarti hai kis tarah

banda-navaz din to bahanon men tal gaya

ye tair-e-nafas bhi to vapas na aaega

jab chhod kar badan ke qafas se nikal gaya

lutf-e-kalam-e-‘mashriqi’ us ko raha bhi yaad

sun kar mushaira men jo meri ghazal gaya

Leave a Comment