Shahid Kamal
ḳhushiyan mat de mujh ko dard-o-kaif ki daulat de sa.in
mujh ko mere dil ke ik ik zaḳhm ki ujrat de sa.in
meri ana ki shah-e-rag par ḳhud meri ana ka ḳhanjar hai
mere lahu ke har qatre ko phir se hiddat de sa.in
ism-e-zat ka raaz hai jo ḳhud mere uupar faash to kar
mere dil ke a.ine ko phir se hairat de sa.in
toḌ de vo divar-e-nafas jo beach men mere haa.il hai
mujh ko mujh se milne ki ik baar jo mohlat de sa.in
main bhi to miTTi huun vo bhi tere chaak ki miTTi huun
apne chaak ki miTTi ko achchhi si surat de sa.in
duniya ka ye jah-o-hasham ye mansab ye jagir hai kya
daulat kaisi mujh ko mera kasa-e-usrat de sa.in
mere is lahje ko bhi ab ek naya ahang to de
mere saare alfaz-o-afkar ko nudrat de sa.in
kar-e-jahan ke mansab se tu ‘shahid’ ko ma.azul bhi kar
kaam use jo kuchh bhi de vo hasb-e-zarurat de sa.in
Leave a Reply