Manzoor Hashmi
na.i zamin na koi asman mangte hain
bas ek gosha-e-amn-o-aman mangte hain
kuchh ab ke dhuup ka aisa mizaj bigḌa hai
daraḳht bhi to yahan sa.eban mangte hain
hamen bhi aap se ik baat arz karna hai
par apni jaan ki pahle amaan mangte hain
qubul kaise karun un ka faisla ki ye log
mire ḳhilaf hi mera bayan mangte hain
hadaf bhi mujh ko banana hai aur mere harif
mujhi se tiir mujhi se kaman mangte hain
na.i faza ke parinde hain kitne matvale
ki bal-o-par se bhi pahle uḌaan mangte hain
Leave a Reply