Ahmad Wasi
gahraiyon se mujh ko kisi ne nikal ke
phenka hai asman ki janib uchhal ke
main ne zamin ko naap liya asman tak
nazron men fasle hain uruj-o-zaval ke
chehre har ik se puchh rahe hain koi javab
shoalon pe kuchh nishan lage hain saval ke
log men ab vo charb-zabani nahin rahi
ya hijr men udaas hain qisse visal ke
har shakhs se mila huun badi ehtiyat se
har shakhsiyyat ko main ne padha hai sambhal ke
ab shairi se sirf hai lafzon ka vasta
rishte tamam ho gae fikr-o-khayal ke
Leave a Reply