Nahin

Azra Abbas

tum ek khayal ki tarah mere dil men

nahin utar sakte

na tum meri aankhon men khvab ban sakte ho

abhi to main tum ko dekh rahi huun

tum ko chhu sakti huun

tumhari ungliyon ki poren

saman bandhte hue

meri poron se takra bhi sakti hain

lekin jab

ye sab kuchh nahin hoga

main tumhen

ek yaad men badal dungi

aur mila dungi

apni un yadon se

jinhen main bhula baithi huun