Aurang Zeb
nahin ye jiit nahin hai tu is ko maat samajh
ki tere saath yahan ho gaya hai haath samajh
main apne payade se tera vazir marunga
ba-ghaur dekh miri chaal vardat samajh
kisi kisi pe hi khulte hain pech-o-ḳham mere
main itna sahl nahin meri mushkilat samajh
mohabbat itni ri.ayat nahin diya karti
agar vo hans ke bhi dekhe to iltifat samajh
miri kahani tire chehre par likhi hui hai
main aa.ina huun mujhe dekh aur baat samajh
dafina jaan in ankhon ko hijr men us ke
jo in men ashk hain pinhan navadirat samajh
guzar chuka hai agar tu sin-e-bulughat se
tu apne jism ko ab vajibuzzakat samajh
nazar ko ek hi nuqte pe murtakiz kar le
dil-o-nigah ki uljhan ko ek saath samajh
dhaḌak raha hai ye kis shaḳhs ki mohabbat men
samajh men aa.en to dil ke muamalat samajh
ye chalte-phirte hue but hain aadmi to nahin
zamin pe char-su barpa hai somnat samajh
ik ek lafz alamat hai husn-e-fitrat ki
ye sha.iri hai so is ki jamaliyat samajh
ruke hue bhi safar kar rahi hai ḳhaak miri
guzar rahi hai guzare bina hayat samajh
khuli hai jab se tiri kina-parvari mujh par
to aa ga.i hai mujhe ek ek baat samajh
tujhe ye ishq ki janib dhakel sakta hai
samajh raha hai to dil ko bhi dost ghaat samajh
jo mujh pe biita hai main ne vahi likha hai ‘zeb’
tu mere sheron ko bas mere tajrabat samajh
Leave a Reply