dahakte kuchh ḳhayal hain ajiib ajiib se
ki zehn men saval hain ajiib ajiib se
tha aftab sub.h kuchh to shaam ko kuchh aur
uruuj aur zaval hain ajiib ajiib se
har ek shahrah par dukanon men saje
tarah tarah ke maal hain ajiib ajiib se
vo paas ho ke duur hai to duur ho ke paas
firaq aur visal hain ajiib ajiib se
nikalna in se bach ke sahal is qadar nahin
qadam qadam pe jaal hain ajiib ajiib se
adab faqat adab hai? ya hai tarjuman-e-zist?
mire yahi saval hain adiib adiib se
Leave a Reply