Naz Muzaffarabadi
nahin ki qubul mudaḳhalat na yasar se na yamin se
jo kiya hai achchha bura amal vo kiya hai apne yaqin se
mujhe chand taron ki bazm men na talash kar ki abhi talak
mujhe apni miTTi se pyaar hai mira rabta hai zamin se
mujhe ek baar nikal ke ye jo phir bulaya hai ḳhuld men
to phir is ke ma.ani yahi hue hai sharaf makan ko makin se
koi shak nahin na.e daur men gaya asman pe aadmi
magar aaj tak nahin kar saka kisi dil ko fat.h machine se
miri qaum-o-mulk ke rahbar zara aql-o-hosh se kaam le
vahi log tere qarib hain jinhen bair hai mire diin se
Leave a Reply