nahin hai mujh ko ai jamshed tere jaam se kaam
jahan-numa hai mujhe apne khush-khiram se kaam
sabhi to diin va duniya ka kaam karte hain
mujhe na diin na duniya ke intizam se kaam
haram men shaikh hain aur dair men barahman hain
hamen nahin hai unhon ke koi kalam se kaam
kunisht-e-dil men hai ik josh but-parasti ka
mujhe buton ki hai khidmat men raam raam se kaam
gharaz na kufr se kuchh hai na diin se matlab
na hai halal se na hai hamen haram se kaam
sanam ke ru-ba-ru rahna mujhe ghanimat hai
na sharm nang se kuchh hai mujhe na naam se kaam
khafa bhi ho ke jo dekhe to sar nisar karun
agar na dekhe to phir bhi hai ik salam se kaam
suna suna ke jo karta hai vaaz-e-husn bayan
pada hai tujh ko hamesha ye fahm-e-kham se kaam
tu apne bakne se ‘miskin’ na ham se duur hua
tujhe to bakne se mujh ko hai apne kaam se kaam
Leave a Reply