Gulzar Dehlvi
dil-e-dard-ashna ka mudda.a kya
kisi bedad ki kiije dava kya
hua insan hi jab insan ka dushman
shikayat phir kisi ki kya gila kya
bahar-e-taza aa.i gulsitan men
khila.e jaane gul bad-e-saba kya
vo kahte hain nasheman tark kiije
chali gulshan men ye taaza hava kya
uThi insaniyat yaksar yahan se
yakayak ḳhu-e-insan ko hua kya
nahin ma.alum mustaqbil kisi ko
marahil pesh aa.en jaane kya kya
ujaḌ kar rah gaya do din men he he
mire ‘gulzar’-e-hindi ko hua kya
Leave a Reply