Khwaja Shauq
naghme ḳhvabida hain nalon ka asar tak chup hai
aap kya chup hain faza hadd-e-nazar tak chup hai
shaam tak mai-kada gulzar-e-sahar tak chup hai
zindagi vaqt ki tajdid-e-safar tak chup hai
saath the aap to manzil bhi sada deti thi
ab ye aalam hai ki har rahguzar tak chup hai
kis ko avaz den is bolte sannaTe men
jis taraf dekhiye divar se dar tak chup hai
aankh darkar hai jazbon ko samajhne ke liye
chehra kya kah sake jab dida-e-tar tak chup hai
be-shu.uron ne uTha rakkhi hai duniya sar par
hosh-mandon ki zaban kya hai nazar tak chup hai
kis se puchhun ki nasheman mira kis ne phunka
bu-e-gul bad-e-saba shaḳh-e-shajar tak chup hai
dil hai ḳhamosh to ḳhamosh hai duniya saari
ek aalam hai idhar se jo udhar tak chup hai
‘shauq’ zindan-e-jahan manzil-e-fariyad nahin
is ḳharabe men to sanson ka safar tak chup hai
Leave a Reply