Nafas-E-Arz-O-Sama Ho Jaise

nafas-e-arz-o-samā ho jaise

maiñ ne ik sher kahā ho jaise

jaise ik chaap koī Duub ga.ī

koī darvāza khulā ho jaise

jaise ubhrā ho koī saaya sā

āḳhirī bulb bujhā ho jaise

jaise rakh de koī āñkhoñ pe qadam

koī aahaT na sadā ho jaise

ab yahāñ koī nahīñ aa.egā

maiñ huuñ aur merā ḳhudā ho jaise

maiñ bhī chup ho gayā pā kar tujh ko

tū bhī kuchh soch rahā ho jaise

vaqt-e-girya tirī yaad aa.ī hai

saath bārish ke havā ho jaise

kaisā vīrān paḌā hai sahrā

koī majnūñ na ‘sanā’ ho jaise

Leave a Comment