Poet
nafas-e-arz-o-sama ho jaise
main ne ik sher kaha ho jaise
jaise ik chaap koi Duub ga.i
koi darvaza khula ho jaise
jaise ubhra ho koi saaya sa
aḳhiri bulb bujha ho jaise
jaise rakh de koi ankhon pe qadam
koi aahaT na sada ho jaise
ab yahan koi nahin aa.ega
main huun aur mera ḳhuda ho jaise
main bhi chup ho gaya pa kar tujh ko
tu bhi kuchh soch raha ho jaise
vaqt-e-girya tiri yaad aa.i hai
saath barish ke hava ho jaise
kaisa viran paḌa hai sahra
koi majnun na ‘sana’ ho jaise
Leave a Reply