na toḌo zindagi rishta jahan se
milega phir koi sathi kahan se
jafa.en hon ki dukh rakh lo ḳhushi se
ki behtar hain ye umr-e-ra.egan se
baharon se na itna dil lagao
ki vahshat ho chale tum ko ḳhizan se
vo manzar ret ke sahil men gum hain
yahi ummid thi ab-e-ravan se
ye ankhen gham se bojhal ho chali hain
utar aa.e masiha asman se
miri ḳhamoshiyan mujrim banin hain
sabab hoga ada kaise zaban se
Leave a Reply